தேர்தல் முடிவுகள் கூறும் பாடங்கள்!

தேர்தல் அறிவிப்பிற்கு முன் அதிமுக ஓரளவுக்கு வெற்றிபெறும் நிலையில் தான் இருந்தது. ஆனால் தேர்தல் நெருங்க, நெருங்க அதன் நிலை கொஞ்சம், கொஞ்சமாக மாறியது. இதற்கு காரணம் முறையான பிரச்சார வியூகம் இல்லாததே!. 1996 - 2001 வரை ஓரளவுக்கு பெரிய தவறுகள் ஏதும் செய்யாமல் ஆட்சி செய்த திமுக-வினால், இப்போது அதிமுக பெற்ற தொகுதிகளை விட குறைவான தொகுதிகளே 2001 தேர்தலில் பெற முடிந்தது என்பதையும் இங்கு நினைவில் கொள்ளவேண்டும்.

குறிப்பாக பசிக்காக துரத்தும் விலங்குகளை விட, உயிருக்காக பயந்துஓடும் விலங்குகளிடம் வேகமும் ஒரு துடிதுடிப்பும் இருக்கும். இந்த தேர்தலும் அப்படித்தான். ஆட்சிப்பொறுப்பில் இருந்த அதிமுகவால் சரியான முறையில் பிரச்சார வியூகம் அமைத்துச் செயல்படவில்லை. ஆனால் இந்த தேர்தல் திமுக-விற்கு வாழ்வா , சாவா போராட்டமாகத்தான் இருந்தது. எனவேதான் மத்தியில் தனக்கு இருந்த செல்வாக்கையும், மாநிலத்தில் தனக்கு இருந்த ஊடக செல்வாக்கையும் எந்த அளவுக்கு பயன்படுத்த முடியுமோ, அந்த அளவுக்கு பயன்படுத்தி இந்த வெற்றியை பெற்றார்கள் என்றால் அது மிகையாகாது.

சிலேடையாக பேசுவதால் மட்டும் ஓட்டு கிடைத்துவிடாது என்பதை உணர்ந்து கொண்ட கருணாநிதி எல்லோருக்கும் முந்திக்கொண்டு , ஓட்டுப்போடும் பாமர மக்களை கவரும் வகையில் பல இலவசங்களுடன் தன் தேர்தல் அறிக்கையை வெளியிட்டார். ஆனால் எந்த தொலைநோக்குப்பார்வையும் இல்லாமல் அறிவிக்கப்பட்ட இந்த இலவச திட்டங்களால், நம் தமிழகத்தின் பொருளாதாரம் எவ்வாரெல்லாம் பாதிக்கப்படப்போகிறது, இதெல்லாம் சாத்தியமா என்று கேள்வி எழுப்பி, தன் ஆட்சியில் அவர்கள் செய்த பொருளாதார சீர்திருத்தங்களால் தமிழகத்தின் பொருளாதார நிலை எப்படியுள்ளது என்பதைப் பற்றிய சரியான பிரச்சாரம் அதிமுக-விடம் இல்லாமல் போனது.

திமுக அறிவித்த பல சாத்தியமில்லாத, சுயநல நோக்கோடு உள்ள இலவச திட்டங்களை, வைகோ கடுமையாக விமர்சித்துக்கொண்டு இருக்கும் போது, அதற்கு மேலும் வலுச்சேர்க்காமல் , மேலும் பல இலவசங்களை ஜெயலலிதா அறிவித்தது, வைகோ-வை தர்மசங்கடமான சூழ்நிலைக்குத் தள்ளியது. கூட்டணியில் இருந்து கொண்டு தேர்தலை சந்திக்கின்ற இவ்வேளையில் ஜெயலலிதா அறிவித்த திட்டங்களை ஆதரிக்கும் சூழ்நிலைக்கு வேறுவழியின்றி தள்ளப்பட்டார் வைகோ?. இதனால் மற்ற கட்சிகளின் ஏளனத்திற்கு ஆளானார்., அதிமுக தேர்தல் அறிக்கைகள் அணைத்தும் எங்களிடம் இருந்து காப்பியடிக்கப்பட்டவை என திமுக-வும் , தேமுதிக-வும் பிரச்சாரம் செய்ய ஜெயலலிதாவின் கடைசிக்கட்ட அறிவிப்புகள் வசதியாகப்போய்விட்டது.

தேமுதிக -விற்கு கிடைத்த பல ஓட்டுகள், இந்த தேர்தலில் அதிமுகவிற்கு விழவேண்டிய ஓட்டுகளேயாகும். அவருக்கு வாக்களித்த பாமர மக்கள பலர் பல இதுவரை ஆதிமுக விற்கு வாக்களித்து வந்தவர்களே. கருனாநிதி எதிர்ப்பு அதிமுக -விற்கு சாதகமாகாமல் தேமுதிக-விற்கு சாதகமானதும் இந்த தேர்தலில் அதிமுக-விற்கு ஏற்பட்ட மற்றுமொரு பின்னடைவாகும்.

எம்ஜியார் இருந்தவரை , தமிழக பாமர மக்களிடம் , கருனாநிதி ஒரு துரோகி, நயவஞ்சகர், சூழ்ச்சிக்காரர் என்பது போன்ற ஒரு இமேஜை ஏற்படுத்தி வைத்திருந்தார். அதோடு ஆரம்பத்தில் அவர் கருனாநிதியை எதிர்த்த அளவிற்கு பிற்காலங்களில் அவர் எதிர்க்கவில்லை. மாறாக கருனாநிதி எம்ஜியாரை அவர் சாகும் வரை விமர்சித்துக்கொண்டுதான் இருந்தார். இது மக்களிடையே கருனாநிதிக்கு ஒரு எதிர்மாறான நிலையையே வைத்திருந்தது. ஆனால் இப்போது ஜெயலலிதா அதுபோன்ற ஒரு எண்ணத்தை மக்கள் மத்தியில் ஏற்படுத்த தவறிவிட்டார்.

ஜெயலலிதா , தன்னுடைய ஆட்சியிலும் சரி, கட்சியிலும் சரி தன்னை மட்டுமே முன்னிலைப்படுத்தி மற்றவர்களை வளரவிடாமல் செய்து கொண்டிருந்ததால், பிரச்சாரத்திற்கு இவரை மட்டுமே இவருடைய கட்சி நம்பவேண்டிய சூழல் இருந்தது. ஆட்சியில் இருந்த போது ஓரளவுக்கு திறமையான அரசு அதிகாரகளை உடன் வைத்திருந்த ஜெயலலிதா, கட்சியில் அப்படி ஒரு கூட்டத்தை வைத்துக்கொள்ளாமல் போனதும் அவர் செய்த மிகப்பெரிய தவறு. தன்னை மிஞ்சி விடுவார்களோ, அல்லதும் துரோகம் செய்து விடுவார்களோ என்கிற பயம் தான் அதற்கு காரணம். ராஜாஜி தன் மேல் வைத்த நம்பிக்கையை பிறர் மேல் வைக்காததால் தான் அவரால் மக்கள் செல்வாக்குமிக்க மிகப்பெரிய அரசியல் தலைவராக உருவாக முடியவில்லை. ஆனால் காந்தி தன்னை நம்புவதை விட மற்றவர்களை அதிகம் நம்பினார். அந்த நம்பிக்கைதான் அவர் பின்னால் இந்தியாவே அணிவகுக்க வைத்தது.

இந்த தேர்தலில் திமுக வென்றாலும், அதற்கு இது மலர் கிரீடம் இல்லை. முற்கிரீடம் தான். ஏனென்றால் நம் மக்கள் தேர்தல் அறிக்கையில் சொன்னவற்றை ஒருவருடத்திற்குள்ளாகவே எதிர்பார்ப்பார்கள். ஒரு 10 அல்லது இருபது வருடங்களுக்கு முன் தெர்தல் அறிக்கை என்பது படித்தவர்களுக்கு மட்டுமே புரியக்கூடியவகையில் இருந்தது. ஆனால் இவர்கள் தங்களின் ஊடகங்கள் மூலம் பட்டி, தொட்டியெங்கும் அதை பரப்பிவிட்டார்கள், தேர்தல் சமயத்திலேயே கணக்கெடுப்பிலும் ஈடுபட்டுவிட்டார்கள். எனவே மக்கள் இவர்களின் அறிக்கையில் சொன்ன சலுகைகளை மிக விரைவில் எதிர்பார்ப்பார்கள். சலுகைகள நிறைவேற்றப்படாத பட்சத்தில் ஆட்சியின் மீதும் கட்சியின் மீதும் மக்களுக்கு நம்பிகை இழக்க வாய்ப்புள்ளது. அப்படி நிறைவேற்றும் பட்சத்தில், இந்த சலுகைகளால் கட்சிக்காரர்கள் மத்தியிலும், அரசு ஊழியர்கள் மத்தியிலும் லஞ்சம் கரைபுரண்டு ஓடும் என்பது மட்டும் நிச்சயம். அதுவும் இந்த ஆட்சிக்கு கெட்டபெயரைத்தான் வாங்கிகொடுக்கப்போகிறது.


இந்த தேர்தலில் மதிமுக எதிர்பார்த்த அளவுக்கு வெற்றிபெறாவிட்டாலும். அரசியல் ரீதியாக இது அவர்களுக்கு கிடைத்த வெற்றிதான். ஏனென்றால் அதிமுக வென்றாலும், சில மாதங்களிலேயே மதிமுக எதிர்கட்சிகளின் வரிசையில் அமரக்கூடிய சூழ்நிலைதான் உருவாகும். இது எல்லோரும் எதிர்பார்க்கும் ஒன்றுதான். அப்படி நடக்கும் பட்சத்தில் ஒரு எதிர்கட்சியாக திமுக-வின் ஓசை இருக்கும் அளவிற்கு மதிமுக-வின் ஓசை இருக்காது. எதற்கெடுத்தாலும் பிரதான எதிர்க்கட்சியின் தலைவரான கருனாநிதியுடன் கூடி முடிவெடுக்கக் கூடிய சூழ்நிலைதான் உருவாகும். அது மதிமுக-வின் எதிர்கால வளர்ச்சிக்கு உகந்ததல்ல. இப்போது திமுக-விற்கு எதிர்கட்சியாக அமரப்போகும் இவர்கள், அதிமுக-வை விட ஒரு எதிர்க்கட்சியாக சிறப்பாக செயல்பட முடியும். அதனால் தங்களுடைய நிலையை தமிழகத்தில் வலுப்படுத்திக்கொள்ள முடியும். எனவே அரசியில் ரீதியாகப்பார்த்தால் இது அவர்களுக்கு வெற்றிதான்.

தேமுதிக-விற்கு மக்களிடைய உள்ள ஆதரவு தமிழகத்தில் கழகங்களின் ஆட்சி மேல் மக்களுக்கு உண்டான வெறுப்பையே காட்டுகிறது. இந்த பலத்தை தக்கவைத்துக்கொள்ளவேண்டும் என்றால், அக்கட்சி உள்ளூர் பிரச்சனைகளுக்கு அக்கட்சி முக்கியத்துவம் கொடுத்து தொடர்ந்து போராடவேண்டும். கட்சியை தொய்வில்லாமல் கொண்டு செல்ல மாவட்ட மற்றும் மாநில அளவிலான கூட்டங்கள் தொடர்ந்து நடத்தப்படவேண்டும். மக்கள் பிரச்சனைகளை கண்டறிந்து போராட திட்டங்களை வகுக்கவேண்டும். ஊடகங்களிடம் நல்ல உறவு வைத்துக்கொள்வது மிக அவசியம். மாநில அளவிலும், மாவட்ட அளவிலும் உள்ள தலைவர்களுக்கும், இரணடாம்கட்ட தலைவர்களுக்கும் மக்களிடையே நல்ல அறிமுகம் வேண்டும். இதை விடுத்து தேர்தலுக்கு தேர்தல் மட்டும் ஓசை எழுப்பிக்கொண்டிருந்தால், விஜய டி ராஜேந்தரின் நிலைதான் தேமுதிக-விற்கும் ஏற்படும்.