இன்னா செய்தாரை ஒறுத்தல் .....

பல ஆண்டுகளுக்கு முன்னால் ஒரு சமுதாயம் இன்னொரு சமுதாயத்திற்கு கொடுமை இழைத்தது என்பதற்காக, இந்த தலைமுறையை சேர்ந்த அந்த சமுதாயங்கள் ஒன்றை ஒன்று தூற்றிக்கொள்வது ஆரோக்கியமான விசயம் அல்ல. அதற்காக அந்த சமுதாயத்தினர் செய்த கொடுமைகள் இல்லை என்று ஆகிவிடாது. அது வரலாற்றில் அந்த சமுதாயத்தின் மீதான ஒரு கலங்கமாக என்றும் இருக்கும்.

உதாரணமாக ஜப்பான் மீது அணுகுண்டு வீசித்தாக்குதல் நடத்தி அதன் பொருளாதாரத்தையே சீரழித்தது அமெரிக்கா. அதற்காக அமெரிக்காவை குறை சொல்லிக்கொண்டிராமல், மற்ற நாடுகளிடமும் அதிகம் கையேந்தாமல் தன் சுய உழைப்பை கொண்டு அந்த நாடு இன்று பொருளாதாரத்தில் உயர்ந்து கொண்டு இருக்கிறது. இன்று பல ஜப்பானியர்கள் அமெரிக்காவிலும், பல அமெரிக்கர்கள் ஜப்பானிலும் வேலை செய்துகொண்டு சகஜமாக பழகிகொண்டுதான் இருக்கிறார்கள். குண்டு வெடித்த நாளன்று ஜப்பானியர்களின் நினைவஞ்சலிகள், அமெரிக்கர்களின் மனங்களில் ஒருவித கணத்தை, தாக்கத்தை ஏற்படுத்தும்.


அதே போல நம் தேசத்தை நாளைய உலகிற்கு எடுத்துச் செல்வார் என்று எதிர்பார்க்கப்பட்ட ராஜிவ் காந்தியை விடுதலைப்புலிகள் கொலைசெய்தனர். நாளை அவர்கள் தனி நாடு அமைத்தாலும் அவர்கள் ராஜிவ் காந்தியை கொன்ற அந்த நிகழ்வு மட்டும் மாறவே மாறது. அது ஒரு அழியாத வரலாற்று வடுவாகத்தான் இருந்துகொண்டுதான் இருக்கும். அதற்காக அடுத்த தலைமுறைகள் பலிவாங்க நினைத்தால் அது முட்டாள்தனம்.

கமல் தேவர்மகன் படத்தில் சொல்ல முற்பட்ட கதை கூட இதுதான். ஒருத்தனை ஒருத்தன் வெட்டிக்கொல்வது, அடுத்த தலைமுறை அதற்கு பலி தீர்ப்பது. பிறகு நீதிமன்றத்திற்கும், வழக்கரிஞர்களுக்கும் இவர்கள் விவசாயத்தில் சம்பாதித்ததையெல்லாம் கொண்டுசென்று கொட்டுவது என்று தான் ஒருகாலத்தில் தென்மாவட்டங்களில் சில சமூகங்கள் இருந்தன. இன்றைய படித்த தலைமுறைகள் கொஞ்சம் கொஞ்சமாக அதை உணரத்தொடங்கியுள்ளது.
ஆனால் சில அரசியல் கட்சிகள் தங்கள் சுயநலத்திற்காக மீண்டும் அவர்களை திசை திருப்ப முயன்று கொண்டிருக்கின்றன. அதே போலத்தான் சில வலைப்பதிவாளர்களும், மற்ற சாதிக்காரர்கள், குறிப்பாக பார்ப்பனர்கள் மேல் தங்களின் நெருப்பைக் கக்கிக்கொண்டிருக்கிறார்கள். இது ஆரோக்கிய்மான விசயம் அல்ல. இதனால் பிரிவினை மேலும் அதிகமாகுமே தவிர குறையாது.

எதற்கெடுத்தாலும் கைபர், பொலன் என்று பல நூற்றாண்டுகளுக்கு முன்பு நடந்ததை கூறிக்கொண்டிருப்பது நல்லவிசயமல்ல. அவர்கள் செய்ததற்கு இப்போது உள்ள மக்கள் என்ன செய்யமுடியும். வேற்றுமைகளை குறைக்க என்ன வழி என்பதைப்பற்றிய விவாதம் தான் இருக்கவேண்டுமே தவிர, மற்றவர்களை குறைகூறுவதாக விவாதங்கள் அமையக்கூடாது. இதை
நாகரீகமாக எதிர்த்தால், உடனே தனி மனித தாக்குதல்களுக்கு தயாராகிவிடுகிறார்கள். அந்த சமயத்தில் நம்முடைய உணர்ச்சிகளும் சில சமயங்களில் கட்டுப்படுத்த முடியாமல் போய்விடுகிறது. சில சமயங்களில் அவ்வாரு நடந்ததற்காக நம்மை நினைத்து வேதனைப்படத்தான் முடிகிறது.

"இன்னா செய்தாரை ஒறுத்தல் அவர்நாண
நன்னயம் செய்து விடல்."

குறள் படிக்கமட்டும் அல்ல, அது காட்டும் நெறிமுறைகளின் படி வாழ்ந்துகாட்டவும்தான். குறளோவியம் எழுதியவர்களுக்கு இது தகுமோ இல்லையோ, ஆனால் மனிதத்தன்மையுள்ள ஒவ்வொருவரும் பின்பற்றவேண்டிய விசயம்.